Ихлас Акаев Темирхан-Шура округну Тёбен Къазаныш юртунда тувгьан ва яшагь­ан, пача асгерини прапорщиги болгьан. Ихласны алты уланыны бирлери Уллу Ватан давда фашист елевчюлеге къаршы ябуша туруп жанларын кьурбан этген. Ону гиччи уланы Салис Акаев яшлай етим къалып, кёп къыйынлыкъланы гёрген. 1941-нчи йыл ол Дагьыстан медицина институтну охуп битдире. Шо йыл ону фронтгьа ала. Дав госпиталларда хирург болуп ишлей.

Мелитополь шагьарны госпиталында яралангьанлагьа операция этегенде, душманны самолётлары шагьаргьа гьужум эте. Шонда С.Акаев авур яралана ва оьзю де госпитальгьа тюше. Сакъатлыгъына гёре ол армия къуллукьдан азат этиле ва Дагьыстангъа къайта. Яралары сав болгьан сонг дагьы да фронтгьа бармакь учун ол арза яза. Тек ону фронтгьа йибермей, Буйнакскидеги эвакогоспитальны начальниги этип белгилей. Районну ва шагьарны ёлбашчыларыны кёмеги булан ол госпитальны дагъы да 600 койкагъа генглешдире. Оьзюню тувра борчлары булан бирче ол шагьардагьы ва райондагьы яшлар уьйлерине де кёмек этип юрюген.

Дагъыстанны эвакогоспиталларыны начальниги С. Ю.Алибеков ону насигьатчысы болуп тургьан ва кёмек этип юрюген. Медицина институтну директору болгьанда ол С.Акаевни де онда ишге чакъыргьан. Ол институтда кандидатлыкь илму ишин якълагьан, доцент, кафедраны заведующийи, сонг декан болгьан. Ол иш ёлдашы Абдулла Магьарамов да булан студентлени, айрокъда спорт булан машгьул болагьанланы айлана- сына жыйып, олагьа болагъан кёмегин этип, насигьат берип юрюген.

Бир гезик Дагъыстанны халкъларыны спартакиадасында С.Акаев, яхшы ябушагъан спортсменни оьзюню янына чакъырып: «Врач болма сюемисен?»- деп сорагьан. Ол уялып, жавап бермей токьтай. Салис Акаев огьар мединститутгьа арза берме таклиф этген. Шо спортсменни - Али Алиевни гьали сав дюнья таный. С.Акаев, насигьат берип, уьйретип, кёп санавда яш уланлар спортну шагьра ёлуна чыкъма болгьан. Оланы арасында А.Шагьназаров, К.Магьмутов, М.Магьарамов, К. Гьашимов ва оьзгелери бар.

Дав йыллардагъы ва къайтгъан сонг къаныгъывлу гьаракаты учун Салис Их­ласович Акаев Къызыл Юлдуз орден, «Къоччакълыгьы учун» деген медаль ва дагьы да алты медаль, «СССР-ни савлукъ сакълавуну отличниги» деген белги булан савгьатлангъан. «Дагъыстанны ат къазангьан врачы» деген атгьа ее болгьан. Салис Акаевни сыйлы аты ва ол этген рагьмулу ишлер кёплени эсинде даимликге кьалгьан.